Ársþing HSV var haldið fimmtudaginn 3.maí síðastliðinn í stjórnsýsluhúsinu á Ísafirði.  Þingforseti var Marinó Hákonarson og Hermann Níelsson til varaþingforseti.  Fjölmargar tillögur lágu fyrir þinginu og sköpuðust góðar umræður í nefndarstörfum.
Jón Páll Hreinsson var endurkjörinn formaður HSV.  Ari Hólmsteinsson og Kolbrún Jónasdóttir voru kosin í aðalstjórn HSV og í varastjórn fengu kosningu Atli Freyr Rúnarsson, Jóhann Torfason og Sigurður Erlingsson.
 Jón Pálsson frá UMFÍ og Garðar Svansson frá ÍSÍ ávörpuðu þingið og veitti Garðar starfsmerki ÍSÍ til Guðna Guðnasonar en Guðni hefur komið að íþróttastarfi hér á Ísafirði frá árinu 1995 sem leikmaður og þjálfari KFÍ og setið í stjórnun KFÍ, unglingaráði KFÍ og aðalstjórn HSV.  
Jón Páll Hreinsson formaður HSV veitti þrjú silfurmerki HSV en þau fengu Hjalti Karlsson, Sigríður Lára Gunnlaugsdóttir og Kristbjörn R. Sigurjónsson en þau hafa öll starfað ötullega innan Skíðafélags Ísafjarðar í fjölmörg ár.

Ársþing HSV verður haldið í stjórnsýsluhúsinu Ísafirði fimmtudaginn 3.maí kl 18:00.  Venjuleg aðalfundarstörf.

Eva Margrét Kristjánsdóttir hjá KFÍ hefur verið valin í U-15 ára landslið Íslands sem tekur þátt í alþjóðlegu móti erlendis í byrjun júní. Jón Halldór Eðvaldsson þjálfari valdi ellefu stúlkur í landliðshópinn. Að því er segir í tilkynningu frá Körfuknattleikssambandi Íslands hefur Ísland tekið þátt í mótinu undanfarin ár með góðum árangri, en U-15 er fyrsta landslið sem fer á mót erlendis hjá KKÍ í sumar.

„Eva Margrét er mjög metnaðarfull stelpa sem æfir gríðarlega vel og hefur það sýnt sig í vetur þar sem framfarir hennar hafa ekki farið fram hjá neinum og er Eva einmitt ásamt félögum hennar í 10. flokk stúlkna að fara í úrslitakeppni Íslandmóts KKÍ sem fer fram 27.-29. apríl í Reykjavík,“ segir í tilkynningu KFÍ. 

Kristín Hálfdánsdóttir, rekstrarstjóri Landflutninga Samskipa á Ísafirði afhenti í gær íþróttaskóla HSV stórglæsilegan styrk. Um er að ræða ágóða af flutningsgjöldum vegna jólapakka til og frá Ísafjarðarbæ um jólin.  Landflutningar-Samskipa ákváðu að andvirði flutninga jólapakka myndi alfarið renna til æskulýðsstarfs á hverju stað og rekstrarstjórum félagsins var falið að velja viðkomandi félag á sínu svæði.   Landflutningar-Samskip á Ísafirði óskuðu eftir því að fá að styrkja íþróttaskóla HSV og þökkum við í HSV kærlega fyrir styrkinn sem kemur sér að góðum notum.   Íþróttaskóli HSV er fyrir öll börn í 1.- 4. bekk grunnskóla. Íþróttskólinn býður upp á grunnþjálfun, boltaskóla, sund og skíði og ýmislegt meira. Markmið skólans að fá sem allra flest börn til að iðka íþróttir og að fyrstu kynni barna af íþróttaiðkun sé jákvæð. Þá fá börnin að kynnast sem flestum íþróttagreinum og að auka gæði þjálfunar, lækka kostnað heimila við íþróttaiðkun barna og auka grunnþjálfunarhluta æfinga, almenna hreyfingu, hreyfiþroska og hreyfigetu. 

Eftir úrslit gærdagsins í 1.deild karla er það ljóst að KFÍ eru orðnir Deildarmeistarar í 1. deild og sæti í Iceland Expressdeildinni staðreynd.  Þetta er frábær árangur hjá KFÍ mönnum sem hafa staðið sig gríðarlega vel á öllum vígstöðum í vetur.  KFÍ enduðu í 2. sæti í sínum riðli í Lengjubikarnum og lögðum að velli bæði Hauka og Fjölni, en þau eru í IE deild.  Liðið komst í fjöggurra liða úrslit í Powerade bikarkeppninni og duttu þar út gegn Powerade meisturunum sjálfum Keflavík 77-90 í hörkuleik. Glæsilegur árangur,  til hamingju KFÍ.

Sjá frekar fréttir af KFÍ á heimasíðu félagsins www.kfi.is 

KSÍ og Boltafélag Ísafjarðar standa fyrir unglingadómaranámskeiði miðvikudaginn 18.janúar. Námskeiðið fer fram í fyrirlestrarsal Menntaskólans á Ísafirði og hefst kl.18:00. Námskeiðið stendur í u.þ.b. 3 klukkustundir og er opið öllu áhugafólki um knattspyrnudómgæslu. Námskeiðinu líkur svo á prófi sem þreytt er 1-2 vikum seinna. Námskeiðið er öllum að kostnaðarlausu.

Skráning fer fram á netfanginu: nonnipje@simnet.is

Héraðssamband Vestfirðinga óskar öllum nær og fjær gleðilegra jóla 

Landflutningar Samskip bjóða nú upp á frábært jólapakkatilboð sem ber nafnið Gleðigjafir. Hægt er að senda jólagjafir hvert á land sem er fyrir 750 kr, og rennur andvirði flutningsgjalda til og frá Ísafjarðarbæ óskipt til íþróttaskóla HSV.

Við hvetjum alla til að nýta sér þetta tilboð og styðja í leiðinni við íþróttaskóla HSV.  íþróttaskóli HSV er fyrir öll börn í 1.-4. bekk grunnskóla.  Íþróttskólinn býður upp á grunnþjálfun, boltaskóla, sund og skíði og eru markmið skólans að. 

• Fá sem allra flest börn til að iðka íþróttir
• Að fyrstu kynni barna af íþróttaiðkun sé jákvæð
• Að börn fái að kynnast sem flestum íþróttagreinum
• Að auka gæði þjálfunar
• Lækka kostnað heimila við íþróttaiðkun barna
• Auka grunnþjálfunarhluta æfinga, almenna hreyfingu, hreyfiþroska og hreyfigetu.

 

 

Endilega látið fréttir af Gleðigjöfunum berast sem víðast.