Fréttir

Ný liðna helgi var 76. ársþing ÍSÍ haldið í Hafnafirði.

Á þinginu var kosið um 7 meðlimi í framkvæmdastjórn, 9 einstaklingar buðu sig fram.

Eftirfarandi hlutu kosningu til næstu fjögurra ára (upptalningin er í stafrófsröð):

Daníel Jakobsson
Elsa Nielsen
Hafsteinn Pálsson
Hjördís Guðmundsdóttir 
Kolbrún Hrund Sigurgeirsdóttir
Olga Bjarnadóttir 
Ragnheiður Ríkharðsdóttir

Fyrir sitja í framkvæmdastjórn ÍSÍ: Lárus L. Blöndal, forseti ÍSÍ, Þórey Edda Elísdóttir, 1. varaforseti ÍSÍ, Garðar Svansson, Hildur Karen Aðalsteinsdóttir, Hörður Þorsteinsson, Úlfur Helgi Hróbjartsson, Viðar Garðarsson og Valdimar Leó Friðriksson.

HSV óskar nýrri stjórn og Daníeli til hamingju með kjörið.

Í samræmi við 7. gr laga HSV er hér með boðað til 23. Héraðsþings HSV, miðvikudaginn 24. maí kl. 17:00. Þingið verður haldið á fjórðu hæðinni í Stjórnsýsluhúsinu.

Dagskrá og upplýsingar um tillögur sem fara fyrir þingið verður gefið út tveimur vikur fyrir þing

Tillögur sem óskað er eftir að teknar verði fyrir á Héraðsþingi, skulu hafa borist stjórn HSV fyrir 10. maí 2023.

Einnig er óskað eftir fólki til að gefa kost á sér í aðalstjórn HSV. Áhugasamir geta haft samand með tölvupósti í hsv@hsv.is fyrir frekari upplýsingar.

Frekari upplýsingar varðandi héraðsþing HSV má finna í lögum HSV sem nálgast má á heimasíðu HSV, hsv.is.

Daniel Osafo-Badu hefur verið ráðinn til starfa sem yfirþjálfari HSV.

Daniel hefur mikla reynslu af þjálfun, hann hefur lokið við UFEA A gráðu og hefur hann m.a. starfað sem aðstoðarþjálfari meistaraflokks Vestra í fótbolta, verið leikmaður liðsins auk þess að þjálfa yngri flokka. Einnig hefur Daniel starfað sem stuðningsfulltrúi í grunn- og menntaskóla.  Daniel stundaði nám við Kingston University árið 2010 í Sports Science.

Daniel er heimamaður og hefur skýra sýn á starfsemi íþróttaskólans og teljum við að hann sé vel til þess fallinn að taka við keflinu af Heiðari. Framtíðin er björt hjá HSV og hefur íþróttaskólinn fest sig í sessi á fyrstu árum Grunnskólans þar sem markmiðið með skólanum er að veita öllum börnum jöfn tækifæri þegar kemur að íþróttum og hreyfingu. Í íþróttaskólanum hafa allir nemendur tækifæri til að kynnast því íþróttastarfi sem er í boði í sveitarfélaginu okkar.

Daniel mun hefja störf um miðjan maí nk. og starfa við hlið Heiðars Birnis út maí mánuð, og tekur svo við keflinu frá 1. júní.

HSV hlakkar samstarfsins við Daniel um áframhaldandi uppbyggingu íþróttaskólans sem og við önnur góð verk HSV og Ísafjarðarbæjar í íþróttamálum.

Barna og unglingaráð knattspyrnudeild Vestra þakkar þeim Anítu og Kristjáni fyrir óeigingjarnt starf.

Aníta Ólafsdóttir og Kristján Þór Kristjánsson gengur úr stjórn barna og unglingaráðs knattspyrnudeildar á aðalfundi deildarinnar í síðustu viku eftir um 15 ára starf. 

Aníta og Kristján hafa unnið ötullt starf í mörg ár fyrir félagið og hafa verið félaginu algjörlega ómisandi síðustu ár. Það er mikill fengur fyrir félagið að hafa notið krafta þeirra og það svona lengi. Það er ekki sjálfgefið að fá svona öfluga sjálfboðaliða og hvað þá að þeir sitji svona lengi í stjórn. 

Er þeim Anítu og Kristjáni þakkað innilega fyrir þeirra störf fyrir knattspyrnuhreyfinguna síðustu ár.

Formaður stjórnar lætur einnig sem af störfum sem formaður, en Jón Hálfdán Pétursson tók við sæti formanns af Tinnu Hrund Hlynsdóttur Hafberg. Kristján Þór er langt í frá hættur að starfa fyrir knattspyrnuna á svæðinu, en hann hefur tekið sæti formanns meistaraflokksráðs kvenna sem er í pípunum hér á svæðinu. 

Stjórnir knattspyrnudeilda eru full skipaðar góðum sjálfboðaliðum, en fyrir það ber að þakka. Félögin ganga ekki án sjálfboðaliða. 

Sjálfboðaliða starfið er sannarlega óeigingjarnt starf.

Jóhanni Torfasyni er fótbolti í blóð borinn og hann hefur verið virkur þátttakandi í íþróttinni allt sitt líf, allt frá því að vera leikmaður og til þess að vera stjórnarmaður í sínu félagi og nefndar- og stjórnarmaður hjá KSÍ.

Jói Torfa hefur um langt árabil starfað að framgangi íslenskrar knattspyrnu, hefur átt stóran þátt í uppbyggingu knattspyrnustarfs á Ísafirði, verið ötull baráttumaður fyrir knattspyrnuna á landsbyggðinni, og lagt mikið af mörkum á vettvangi KSÍ, sér í lagi þegar kemur að verkefnum yngri landsliða. Jóhann Torfason hefur gert knattspyrnuíþróttinni ómetanlegt gagn.

Þess má geta að Jóhann var einnig sæmdur Heiðurskrossi ÍSÍ sama dag fyrir mikið og óeigingjarnt starf í þágu íþróttahreyfingarinnar á Vestfjörðum, knattspyrnuhreyfingarinnar og ÍSÍ.

HSV óskar honum til hamingju með viðurkenningarnar.