Lög Héraðssamband Vestfirðinga (HSV)
Lög Héraðssambands Vestfirðinga
I. kafli. Um sambandið
1. grein - Heiti og starfssvæði
Sambandið heitir Héraðssamband Vestfirðinga. Skammstafað HSV. Sambandssvæðið er Ísafjarðarbær og Súðavíkurhreppur. Heimili og varnarþing er Ísafjarðarbær.
2. grein - Tilgangur og hlutverk sambandsins
Tilgangur sambandsins er að efla samhug og samvinnu á norðanverðum Vestfjörðum, stuðla að fjölbreyttu íþrótta- og félagsstarfi aðildarfélaganna og vera málsvari félaganna út á við. HSV skal starfa samkvæmt lögum UMFÍ og ÍSÍ.
Hlutverk HSV er:
Að stjórna sameiginlegum íþróttamálum héraðsins, en að sérráð, er stofnuð eru, fara með stjórn sérgreinamála innan héraðsins. Að annast samstarf um íþróttamál við sveitar- og bæjarstjórnir og aðra opinbera aðila innan héraðsins. Að varðveita og skipta milli félaganna því fé, sem til þess hefur verið veitt. Að aðstoða við skipulag, undirbúning og framkvæmd íþróttamóta í héraði. Að hafa frumkvæði að eflingu íþróttastarfs innan héraðs. Að staðfesta lög/lagabreytingar aðildarfélaga og halda utan um staðfest lög félaga. Að tilkynna ÍSÍ og viðkomandi sérsambandi um stofnun nýrra félaga og deilda. Að fylgjast með því að starfsemi aðildarfélaga fari fram skv. gildandi lögum þeirra og íþróttahreyfingarinnar í heild. Að tryggja góða stjórnarhætti innan héraðssambandsins. 3. grein - Stjórnun HSV
HSV er stjórnað af:
Ársþingi HSV Stjórn HSV
II. kafli. Aðild
4. grein - Réttur til aðildar
Rétt til að vera í sambandinu hafa þau ungmenna- og íþróttafélög, sem eru á sambandssvæðinu og hafa lög sín í samræmi við lög Íþrótta- og Ólympíusambands Íslands og Ungmennafélags Íslands og starfa í anda þeirra.
5. grein - Umsókn um aðild
Umsóknum íþróttafélaga um inngöngu í sambandið skulu fylgja lög og aðrar samþykktir, félagatal, upplýsingar um stjórn og helstu nefndir og stofndag félagsins. Sambandsstjórn úrskurðar um inngöngu, en ársþing skal staðfesta með fyrirvara um staðfestingu UMFÍ og ÍSÍ.
6. grein - Skyldur aðildarfélaga
Hvert aðildarfélag skal halda aðalfund, leggja fram skýrslur og ársreikninga og bera upp við félagsmenn sína eins og lög þess gera ráð fyrir og staðfest hafa verið af HSV og ÍSÍ.
Senda skal aðalfundarboð til stjórnar HSV. Fundargerðir aðalfunda skal senda stjórn HSV eftir að aðalfundur hefur farið fram, eigi síðar en viku eftir aðalfund. Ef breytingar eru gerðar á lögum aðildarfélaga sambandsins skulu breytingar sendar til stjórnar HSV sem leggur breytingar fyrir framkvæmdastjórn ÍSÍ.
7. grein - Starfsskýrslur og ársskýrslur
Hverju aðildarfélagi innan HSV er skylt að skila starfsskýrslu ÍSÍ/UMFÍ eigi síðar en 15. apríl ár hvert. Starfsskýrslur skulu innihalda félagatal, iðkendatal, lög og ársreikninga.
Aðildarfélög skulu skila ársskýrslum til sambandsins að loknum aðalfundum sínum eða eigi síðar en 30. apríl. Ársskýrslur skulu innihalda skýrslu stjórnar með árituðum ársreikningi.
8. grein - Vanefndir aðildarfélaga
Hvert það aðildarfélag sem ekki hefur haldið aðalfund, sent skýrslur og ársreikninga í samræmi við 6. og 7. grein, missir atkvæðisrétt sinn á næsta ársþingi HSV.
Ef félag uppfyllir ekki lengur þau starfsskilyrði sem kveðið er á um í grein 5.2. í lögum ÍSÍ, er stjórn sambandsins heimilt að vísa félaginu úr HSV að undangenginni aðvörun.
Ef sambandið telur að aðildarfélag hafi brotið lög eða reglur ÍSÍ eða starfsemi þess sé ekki í samræmi við stefnu og markmið ÍSÍ, skal það tafarlaust tilkynna framkvæmdastjórn ÍSÍ formlega um málið. Framkvæmdastjórn metur hvort um brot sé að ræða og getur höfðað mál gagnvart félaginu fyrir Dómstól ÍSÍ telji hún svo vera, sbr. gr. 31.3 í lögum ÍSÍ.
Víki ársþing HSV félagi úr sambandinu er stjórn HSV skylt að tilkynna það til ÍSÍ og viðkomandi sérsambands/sérsambanda. Félag sem hefur verið vikið úr sambandinu getur óskað eftir aðild að HSV að nýju. Skal þá fara með umsóknina samkvæmt 5. grein þessara laga.
III. kafli. Ársþing
9. grein - Hlutverk
Ársþing HSV fer með æðsta vald í málum sambandsins. Ársþing skal halda fyrir maílok ár hvert. Þing má ekki halda á sömu dögum og íþróttaþing ÍSÍ eða formannafundir ÍSÍ og UMFÍ. Skal stjórnin boða til þess með minnst eins mánaðar fyrirvara.
Dagskrá, reikningar, fjárhagsáætlun og tillögur sem borist hafa ásamt tillögum sem stjórn hyggst leggja fyrir þingið skulu kynntar aðildarfélögunum með síðara þingboði í síðasta lagi tveimur vikum fyrir ársþing.
Boðun þings og framlagning gagna fyrir og á ársþingi má vera á rafrænu formi.
10. grein - Málefni ársþings
Á þinginu skal ræða málefni sambandsins og aðildarfélaga þess. Þar skal stjórnin gefa fulltrúum skýrslu um starfsemi liðins árs og leggja fram reikninga sambandsins yfirfarna af skoðunarmönnum sambandsins og fjallar þingið um hvort tveggja. Þingið kýs stjórn og skoðunarmenn ársreikninga skv. ákvæðum 13. grein laga þessara. Enn fremur kýs það nefndir. Getur þingið falið sambandsstjórn að annast tilnefningu þessara starfskrafta á sérstökum stjórnarfundi ef stjórnin æskir þess.
11. grein - Fulltrúar
Sambandsfélögin velja aðalfulltrúa og varafulltrúa til að mæta á ársþing, einn fyrir hverja 50 gjaldskylda félagsmenn 18 ára og eldri, verði 25 umfram má kjósa einn fulltrúa fyrir það brot. Þó skulu fulltrúar aldrei vera fleiri en 9 frá sama félagi og aldrei færri en einn. Stjórnarmeðlimir sambandsins hafa atkvæðisrétt þótt þeir séu ekki kjörnir fulltrúar. Ársþing er lögmætt, ef löglega er til þess boðað.
12. grein - Réttur til þingsetu
Atkvæðisrétt á ársþingi hafa aðeins kjörnir fulltrúar þeirra félaga sem skilað hafa inn skýrslum skv. 7. grein. Sambandsstjórn HSV hefur einnig atkvæðisrétt. Auk þeirra eiga rétt til þingsetu og hafa þar málfrelsi og tillögurétt:
- a) Fulltrúar ÍSÍ og UMFÍ
- b) Fulltrúar sveitarfélaganna á sambandssvæðinu
- c) Skoðunarmenn reikninga
- d) Starfsmenn sambandsins
Sambandsstjórn HSV getur boðið öðrum aðilum þingsetu ef hún telur ástæðu til.
Aðeins sá sem er í félagi innan sambandsins er kjörgengur fulltrúi þess á ársþingi. Hver fulltrúi hefur eitt atkvæði. Allir þingfulltrúar með atkvæðisrétt skulu hafa kjörbréf.
13. grein - Dagskrá þingsins
Störf ársþings, sem er æðsti aðili Héraðssambands Vestfirðinga, eru þessi:
- Þingsetning
- Kosning fyrsta og annars þingforseta
- Kosning fyrsta og annars þingritara
- Kosning þriggja manna kjörbréfanefndar
- Skýrsla stjórnar og reikningar sambandsins kynntir
- Umræður um skýrslu stjórnar og reikninga
- Álit kjörbréfanefndar
- Reikningar bornir undir atkvæði
- Ávörp gesta
- Skipan í starfsnefndir eftir þörfum hverju sinni
- Allsherjarnefnd
- Fjárhagsnefnd
- Laganefnd
- Fjárhagsáætlun fyrir næsta ár lögð fram
- Laga- og reglugerðabreytingar lagðar fram
- Aðrar tillögur lagðar fram
- Nefndarstörf um framlagðar tillögur og önnur mál sem nefndir ákveða að taka fyrir
- Afgreiðsla á áliti nefnda
- Önnur mál
- Kosningar
Kosning formanns Kosning tveggja stjórnarmanna Kosning þriggja manna í varastjórn Kosning tveggja skoðunarmanna reikninga og tveggja til vara Kosning þriggja manna uppstillingarnefndar
- Þingslit
Ef lægsta atkvæðatala til að ná kosningu fellur á tvo eða fleiri, skal kjósa um þá á ný, bundinni kosningu. Verði þeir enn jafnir, ræður hlutkesti. Einfaldur meirihluti ræður úrslitum nema um lagabreytingar sé að ræða.
14. grein - Aukaþing
Aukaþing skal halda ef nauðsyn krefur og ef helmingur sambandsaðila óskar þess. Allur boðunar- og tilkynningarfrestur til aukaþings má vera helmingi styttri en til reglulegs þings. Fulltrúar á aukaþingi eru þeir sömu og voru á næsta reglulega þingi á undan og gilda sömu kjörbréf. Þó má kjósa að nýju í stað fulltrúa sem er látinn, veikur eða forfallaður á annan hátt. Á aukaþingi má ekki gera laga- eða reglugerðabreytingar og ekki kjósa stjórn nema bráðabirgðastjórn, ef meirihluti kjörinnar aðalstjórnar hefur sagt af sér eða hætt störfum af öðrum orsökum eða stjórnin hefur að eigin dómi orðið óstarfhæf. Að öðru leyti gilda um það sömu reglur og um reglulegt ársþing.
IV. kafli. Stjórn HSV
15. grein - Skipun
Stjórn sambandsins skipa 5 menn. Formaður skal kosinn sérstaklega til eins árs í senn. Aðrir stjórnarmenn skulu kosnir til tveggja ára, þó þannig að aðeins skal kosið um tvo árlega. Árlega skal kjósa þrjá menn í varastjórn og ennfremur tvo skoðunarmenn reikninga og tvo til vara. Formaður eða varaformaður aðildarfélags er ekki kjörgengur í stjórn sambandsins. Stjórn er heimilt að skipa starfsnefndir sér til aðstoðar við sérstök verkefni eða ákveðna þætti starfsins, telji hún þess þörf.
16. grein - Hlutverk
Stjórnin stýrir málefnum sambandsins milli þinga og fylgist með starfsemi félaganna. Hún varðveitir sjóði sambandsins og aðrar eignir og leggur fram skoðaða reikninga á hverju ársþingi. Stjórn sambandsins svo og nefndir þess skulu halda gerðabók.
17. grein - Formannafundir
Eigi sjaldnar en tvisvar sinnum á ári skal stjórn HSV halda fund með formönnum félaga og formönnum deilda ásamt formönnum einstakra nefnda þegar ástæða þykir til, þar sem stjórnin skýrir störf sín og rædd verða viðfangsefni héraðssambandsins og aðildarfélaga þess.
Atkvæðisrétt á formannafundum skulu hafa sambandsstjórn og formenn félaga, en nefndarmenn því aðeins ef um sérmálefni nefnda þeirra er að ræða. Aldrei fer þó einn og sami maður með nema eitt atkvæði.
V. kafli. Lagabreytingar
18. grein - Tillögur til lagabreytinga
Tillögur til lagabreytinga skal leggja fram í upphafi þings og þeim síðan vísað til laganefndar. Tillögur til lagabreytinga skulu hafa borist sambandsstjórn 30 dögum fyrir ársþing og skulu þær þá sendar sambandsaðilum.
Ársþing getur breytt lögum þessum með 2/3 greiddra atkvæða, atkvæðisbærra fulltrúa á ársþingi.
VI. kafli. Ýmis ákvæði
19. grein - Uppstillingarnefnd
Uppstillingarnefnd starfar í aðdraganda ársþings. Hlutverk nefndarinnar er að koma með tillögur til stjórnarkjörs og annarra embætta sem kosið er til á ársþingi HSV. Nefndin skiptir með sér verkum og skal eiga samráð við stjórn HSV síðasta mánuðinn fyrir ársþing.
20. grein - Slit HSV
Héraðsambandinu HSV verður ekki slitið nema á ársþingi og þá aðeins, að 4/5 atkvæðisbærra fulltrúa þeirra, er rétt eiga til setu á þinginu sbr. 12. grein. Með slíkri samþykkt er störfum þessa þings tafarlaust lokið, en fráfarandi stjórn skal sitja áfram með fullu umboði. Skal hún boða til annars ársþings sex mánuðum síðar. Sé þá aftur samþykkt með 4/5 atkvæða atkvæðisbærra fulltrúa að slíta sambandinu, er sambandinu formlega slitið.
Skulu eignir sambandsins renna til nýrra heildarsamtaka íþróttafélaganna á sambandssvæðinu, í samráði við stjórnir ÍSÍ og UMFÍ. Gerðabækur sambandsins skulu varðveitast á Héraðsskjalasafninu Ísafirði.
VII. kafli. Gildistaka
21. grein - Gildistaka laga HSV
Lög þessi öðlast gildi þegar framkvæmdastjórn ÍSÍ hefur samþykkt þau. Eldri lög falla jafnframt úr gildi.
Samþykkt á Ársþingi HSV á Þingeyri 28. maí 2026.