Fréttir

Fundurinn fór fram á 4 hæð

Ársþing HSV 2024 var sett þriðjudaginn 7. maí og fór það fram á 4. hæð stjórnsýsluhússins á Ísafirði. Anton Helgi Guðjónsson formaður setti þingið, það tuttugasta og fjórða.  Sigurður Hreinsson var kosinn fyrsti þingforseti og Gylfi Ólafsson annar þingforseti.  Þokkaleg mæting var á þingið en gildir þingfulltrúar voru 24 og þáttakendur í heild um 30.

Jón Aðalsteinn Bergsveinsson, Kynningarfulltrúi UMFÍ og ritstjóri Skinfaxa ávarpaði þingið og flutti þingfulltrúum kveðjur frá stjórn UMFÍ.

Þingið samanstóð í aðalatriðum af hefðbundnum aðalfundarstörfum, skýrslu stjórnar, afgreiðslu reikninga og fjárhagsáætlunar, auk þess sem allnokkrar tillögur voru afgreiddar á þinginu.  Ein tillagan sem var samþykkt, snýr yfirstandandi þjóðarmorði Ísraelsmanna á Palestínumönnum og afstöðuleysi stjórnvalda og íþróttahreifingarinnar til þeirra voðaverka sem eiga sér stað á Gasa.  Var í ályktuninni þess krafist „að ísraelskir íþróttamenn fái samskonar útilokun frá alþjóðaviðburðum og þeir rússnesku.“  Þá segir jafnframt að: „áframhaldandi afstöðuleysi íþróttahreifingarinnar getur í besta falli talist hræsni en í versta falli kynþáttafordómar og meðsekt í þjóðarmorði.“

Þegar kom að liðnum kosningar vandaðist hinsvegar málið.  Ekki lág fyrir framboð á nægjanlegum fjölda stjórnarmanna til að fullmanna stjórn sambandsins.  Samþykkt hafði verið á síðasta ársþingi sú breyting á lögum, að kosið yrði í uppstillingarnefnd, en sá liður varð ekki virkur fyrr en á þessu þingi.  Lendingin varð því sú að kjósa á þinginu 3ja manna uppstillingarnefnd og fresta þingi um 2 vikur, á meðan nefndin starfaði.  Var í framhaldinu boðað til framhaldsþings þriðjudaginn 21 maí.

Framhaldaársþing HSV var svo sett 21 maí kl 17.00 á sama stað og hið fyrra.  Eini liður var á dagskrá, sem voru kosningar.

Samkvæmt reglum er árlega kosið um öll sæti í stjórn nema þau tvö sem kosin voru á síðasta þingi til tveggja ára, sem voru þau Ingibjörg Elín Magnúsdóttir og Páll Janus Þórðarson.

Uppstillingarnefnd gerði það að tillögu að Sigurður Hreinsson yrði nýr formaður HSV, tveir aðilar í aðalstjórn til tveggja ára, yrðu þau Magnús Þór Bjarnason og Hafsteinn Már Andersen. Og í varastjórn þau Axel Sveinsson, Anton Helgi Guðjónsson og Sif Huld Albertsdóttir.  Voru tillögur uppstillingarnefndar samþykktar með lófataki.

Stjórn HSV er þá þannig skipuð næsta árið:

Sigurður Hreinsson – formaður

Hafsteinn Már Andersen

Magnús Þór Bjarnason

Ingibjörg Elín Magnúsdóttir

Páll Janus Þórðarson

Varastjórn:

Axel Sveinsson

Anton Helgi Guðjónsson

Sif Huld Albertsdóttir

Á ársþingi HSV sem haldið var í gær, 7. maí voru þremur einstaklingum veittar heiðursviðurkenningar HSV.  Tvö gullmerki og eitt silfurmerki voru veitt einstaklingum sem að hafa unnið ötult starf í þágu íþróttahreyfingarinnar

Eftirfarandi fengu viðurkenningar.

Gullmerki HSV:

Þórunn Pálsdóttir

Tilnefnd til gullmerkis HSV af Skíðafélagi Ísfirðinga

Þórunn hefur átt langa samleið með Skíðafélagi Ísfirðinga og hefur hún komið víða við í starfi félagsins. Hún byrjaði sem iðkandi í alpagreinum og keppti fyrir hönd félagsins á fjölmörgum mótum með góðum árangri. Síðar kom hún sterk inn í starf félagsins sem foreldri og fór meðal annars í æfinga- og keppnisferðir sem farastjóri. Víst er að enginn var svikinn um ást og umhyggju í þeim ferðum. Einnig var Þórunn gjaldkeri í stjórn SFÍ um nokkurra ára skeið.

Þórunn er einn af þessum sterku póstum sem Skíðafélagið byggir starf sitt á. Þó hún eigi ekki lengur iðkendur í félaginu er hún alltaf tilbúin að leggja fram vinnu hvort sem það er bakstur, aðstoð við þjálfun, vinna við mót eða hvað annað sem félagið tekur sér fyrir hendur. Nú síðasta áratuginn og ríflega það hefur Þórunn haft umsjón með Skíðaskálanum í Tungudal. Þar eru mörg handtökin sem þarf að vinna: Sjá um bókanir, skipta um á rúmum, þrífa, sinna þvotti, kaupa inn og passa upp á viðhald svo nokkuð sé nefnt. Þetta hefur Þórunn unnið í sjálfboðavinnu og þar með bæði sparað félaginu útgjöld og aflað því tekna.

Skíðafélag Ísfirðinga þakkar af heilum hug Þórunni fyrir hennar framlag, það er ómetanlegt að eiga svona liðsmann.

Jóhanna Oddsdóttir hefur verið viðloðandi skíðaíþróttina allt frá blautu barnsbeini enda fædd inn í eina þekktustu skíðaætt Ísfirðinga. Grænagarðsættina. Hún hefur um áratugaskeið verið eina af driffjöðrunum í starfi Skíðafélags Ísfirðinga.

Allir sem starfa að félagsmálum vita að án öflugra sjálfboðaliða getur ekkert félag lifað til lengdar. Og það finnast varla öflugri sjálfboðaliðar en Jóhanna Oddsdóttir. Hvænar sem þörf er á dugandi fólki til vinnu á Seljalandsdalnum er Jóhanna mætt fyrst allra, gjarnan með hann Nonna sinn með sér, og vinnur eins og sleggja uns verkefið hefur verið klárað. Gildir þá einu hvort um er að ræða uppsetningu á snjógirðingum, vinnu við mótahald, tiltekt í skálanum eða eitthvað annað. Alltaf má stóla á Jóhönnu. Hún hefur líka um árabilt stýrt af röggsemi einu stærsta kaffihlaðborði á Íslandi, Fossavatnskaffinu og setið í ritnefnd Skíðablaðsins í ótal mörg. Jóhanna hefur setið í stjórn skíðafélagsins og sinnt formennsku í mörg ár og skilið eftir sig gott verk. Ef skíðafélagið þarf á fólki að halda þá mætir Jóhanna. Ekki má heldur gleyma hlutverki hennar sem skíðamamma, því hún lagði Skíðafélagi Ísfirðinga til einn besta skíðagöngumann landsins undanfarin ár, Albert Jónsson.

Það er ótrúlega dýrmætt fyrir Skíðafélagið, og fyrir íþróttahreyfinguna, að eiga bandamenn eins og Jóhönnu Oddsdóttur. Jóhanna hlaut silfurmerki HSV árið 2018 og nú er komið að því að stíga skrefið til fulls og veita henni sjálft gullmerkið.

Silfurmerki HSV:

Leifur Bremnes hefur unnið gífurlega mikið sjálfboðaliðastarf hjá skotíþróttafélagi Ísafjarðar.

Núna þegar við erum að byggja aðstöðu , hefur Leifur notað allan sinn frítíma í að vinna við aðstöðuna. Svona menn eru ótrúlega dýrmætir fyrir félögin.

Í samræmi við 7. gr laga HSV er hér með boðað til 24. Héraðsþings HSV, þriðjudaginn 7. maí kl. 17:00. Þingið verður haldið á fjórðu hæðinni í Stjórnsýsluhúsinu.

Dagskrá og upplýsingar um tillögur sem fara fyrir þingið verður gefið út tveimur vikur fyrir þing

Tillögur sem óskað er eftir að teknar verði fyrir á Héraðsþingi, skulu hafa borist stjórn HSV fyrir 1. maí 2024.

Einnig er óskað eftir fólki til að gefa kost á sér í aðalstjórn HSV. Áhugasamir geta haft samand með tölvupósti í hsv@hsv.is fyrir frekari upplýsingar.

Frekari upplýsingar varðandi héraðsþing HSV má finna í lögum HSV sem nálgast má á heimasíðu HSV, hsv.is.

Úthlutað hefur verið styrkjum úr Afrekssjóði HSV. Sjóðurinn gegnir mikilvægu hlutverki fyrir íþróttafólkið okkar hérna heima í héraði og erlendis.

Alls bárust þrettán umsóknir.

Stjórn Afrekssjóðsins hefur tekið ákvörðun um að gera samning við fimm einstaklinga um mánaðarlega styrki fyrir árið 2024. Helsta markmið með samningunum er að auka utanumhald og stefnumörkun á afrekssviði og jafnframt er sett aukin áhersla á markmið og markvissan undirbúning þeirra iðkenda sem stefna að því að komast í fremstu röð.

Þeir íþróttamenn sem gerður er samningur við eiga það öll sameiginlegt að vera með skýr og góð markmið um að styrkja sig og eflast í sinni íþróttagrein. 

Einnig voru veittir styrkir til átta íþróttamanna samkvæmt því ferli sem áður hefur verið úthlutað eftir hjá Afrekssjóðnum.

Þeir íþróttamenn sem gerðir verða árssamningar við eru:

Dagur Benediktsson, Skíðafélag Ísfirðinga

Ástmar Helgi Kristinsson, Skíðafélag Ísfirðinga

Grétar Smári Samúelsson, Skíðafélag Ísfirðinga

Guðrún Helga Sigurðardóttir, Lyftingardeild Vestra

Hákon Ari Heimisson, Blakdeild Vestra

Þeir íþróttamenn sem hlutu stakan styrk eru:

Sveinbjörn Örri Heimisson, Skíðafélag Ísfirðinga

Eyþór Freyr Árnason, Skíðafélag Ísfirðinga

Ísar Logi Ágústsson, Skíðafélag Ísfirðinga

Pétur Þór Jónsson, Handknattleiksdeild Harðar

Dagný Emma Kristinsdóttir, Körfuknattleiksdeild Vestra

Elmar Breki Baldursson, Körfuknattleiksdeild Vestra

Kacper Tyszkiewicz, Blakdeild Vestra

Pétur Örn Sigurðsson, Blakdeild Vestra

HSV óskar þessum afreksíþróttamönnum til hamingju