Fréttir

Fyrir leik meistaraflokks Kkd. Vestra og Selfoss 17. febrúar síðastliðinn skrifuðu bræðurnir Hugi og Hilmir Hallgrímssynir undir afrekssamning við Afrekssjóð HSV.  Samningarnir fela í sér að Afreksjóður greiðir mánaðarlegan styrk til íþróttamannanna í eitt ár.  Er þetta annað árið í röð sem bræðurnir gera slíkan samning við sjóðinn.

Guðný Stefanía Stefánsdóttir, formaður stjórnar Afrekssjóðs, skrifaði undir samninginn fyrir hönd HSV en Ingólfur Þorleifsson, formaður Kkd. Vestra, skrifaði undir fyrir hönd félagsins.

Bræðurnir, sem eru nýorðnir 18 ára, þykja vera einir efnilegustu körfuboltamenn Íslands um þessar mundir.  Þeir hafa verið lykilleikmenn og náð frábærum árangri með yngri liðum Kkd. Vestra, t.d. bikarmeistaratitill í 9. flokki árið 2017, silfur í Íslandsmóti 10. flokks 2018 og sigur á Scania Cup í Svíðþóð síðastliðið sumar.  Einnig spila þeir stór hlutverk fyrir meistaraflokk Kkd. Vestra á þessu tímabili. Hilmir og Hugi stunda nám við Menntaskólann á Ísafirði og eru þar á Afreksbraut.

Í morgun var tilkynnt að bræðurnir eru báðir valdir í 16 manna U18 ára landsliðshóp KKÍ vegna verkefna á komandi sumri en þeir voru liðsmenn U18 í fyrra auk U16 og U15 árin þar á undan. U18 ára landsliðið keppir á NM í Finnlandi í júní og EM í Oradea í Rúmeníu í júlí.

HSV óskar þessum efnilegu íþróttamönnum innilega til hamingju með frammistöðuna og samninginn.

Linda og Anna ásamt Díönu Jóhannsdóttur formanni SKÍ við undirritun samninga.

Í byrjun mánaðarins gerði HSV samning við þær Lindu Rós Hannesdóttur og Önnu Maríu Daníelsdóttur.   Samningarnir fela í sér að Afrekssjóður greiðir mánaðarlega styrki til íþróttafólksins árið 2020. Díana Jóhannsdóttir undirritaði samninginn fyrir hönd Skíðafélags Ísafjarðar.

Linda Rós Hannesdóttir er 17 ára og kepptir í gönguskíðum og er ein af efnilegustu íþróttamönnum landsins. Linda hefur meira og minna unnið öll mót sem að hún hefur tekið þátt í hér landi. Hún hefur verið. unglingameistari, Andrésarmeistari og bikarmeistari.  Einnig tók hún þátt fyrir Íslands hönd á ólympíumóti æskunnar í byrjun árs.  Í lok árs 2019 var Linda valin efnilegasti íþróttamaður Ísafjarðarbæjar.

Anna María 20 ára og hefur verið mikið við keppni erlendis þetta tímabilið þar helst í Svíþjóð.  Anna mun keppa fyrir Íslands hönd á HM unglinga sem fram fer í Þýskalandi í lok febrúar.  Vorið 2019 lauk Anna við stúdentspróf frá Ullricehamn skíðaframhaldsskóla í Svíþjóð.

HSV og stjórn afrekssjóðs óskar Önnu og Lindu innilega til hamingju.

HM unglinga í skíðagöngu fer fram í Oberwiesenthal í Þýskalandi, dagana 28.febrúar - 8.mars.

Hvorki meira né minna en fjórir keppendur úr Skíðafélagi Ísafjarðar (SFÍ) eru á meðal keppenda á mótinu.  

Skíðagöngunefnd SKÍ valdi keppendur á mótið skv. gildandi valreglu:

U20:

Anna María Daníelsdóttir - SFÍ

Jakob Daníelsson - SFÍ

U23:

Kristrún Guðnadóttir - Ullur

Isak Stianson Pedersen - SKA

Albert Jónsson SFÍ

Dagur Benediktsson - SFÍ

Þjálfari er Vegard Karlström

HSV óskar keppendum SFÍ sem og öðrum keppendum til hamingju með valið

Gangi ykkur vel!

Æfingar fyrir börn fædd árin 2007-2009 hefjast fimmtudaginn 30. janúar og fara æfingar fram í Íþróttahúsinu á Torfnesi alla fimmtudaga kl. 14:00-15:00. Fyrstu þrjár vikurnar eru fríar og hvetjum við alla á aldrinum 10-12 ára að koma og prófa. Skráning á námskeiðið hefst í byrjun febrúar.

Markmið verkefnisins er að ná til barna sem eru í 5.-7. bekk í grunnskóla og eru ekki að stunda æfingar hjá aðildarfélögum HSV. Mest áhersla verður lögð á grunnþjálfun eins og stöðvaþjálfun þar sem hver og einn getur tekið þátt eftir sinni getu. Auk þess verða kynntar fyrir þátttakendum hinar ýmsu einstaklingsíþróttagreinar svo sem bogfimi, golf, sund, hestamennska, hjólreiðar, glíma og skylmingar. Áhersla verður líka lögð á hópeflisleiki til þess að hrista hópinn saman og efla félagsleg tengsl iðkenda. Takmarkið er að krakkarnir fái áhuga og finni ánægju af að stunda hreyfingu og íþróttir.

Hægt er að gera undantekningu á aldursskiptingu ef einhver börn finna sig ekki í Íþróttaskólanum eða Afreksformi HSV.

Umsjón með æfingum hefur Bjarney Gunnarsdóttir, yfirþjálfari Íþróttaskólans.

Nánari upplýsingar á ithrottaskoli@hsv.is eða í síma 6963984.

Sif Huld Albertsdóttir, Guðríður Sigurðardóttir og RAnnveig Pálsdóttir

Í hófi sem Ísafjarðarbær hélt í tilefni af únefningu íþróttamanns Ísafjarðarbæjar voru þær Rannveig Pálsdóttir og Guðríður Sigurðardóttir heiðraðar fyrir störf sín í þágu lýðheilsu kvenna, en þær Guðríður og Rannveig hafa staðið fyrir leikfimitímum fyrir konur í íþróttasalnum við Austurveg tvisvar í viku í yfir 40 ár.

Mikilvægi góðrar líkamlegrar heilsu verður seint ofmetið og það skiptir miklu máli að hver og einn finni vettvang sem hentar sér til að sinna henni. Það er óhætt að segja að þær Guðríður og Rannveig hafi skapað þennan vettvang fyrir fjölda kvenna í Ísafjarðarbæ sem hafa undir handleiðslu þeirra fengið tækifæri til að rækta líkamann í uppbyggjandi félagsskap. Það má ekki heldur gleyma hversu góð áhrif líkamleg hreyfing hefur á andlega heilsu, eða eins og kona sem hefur sótt tíma hjá þeim í 39 ár sagði: „Ég veit ekki hvernig mér liði ef ég hefði ekki þessa tíma.“ Það er einnig eftirtektarvert hversu vel þær fylgjast með nýjungum og eru þær sífellt að uppfæra æfingar í takt við nýjustu rannsóknir og þróun í líkmasrækt.

Ísafjarðarbær hefur frá hausti 2018 verið heilsueflandi samfélag og þessi viðurkenning til þeirra Rannýjar og Guðríðar er sannarlega í þeim anda og lýðheilsumarkmiða almenn.

Það var Sif Huld Albertsdóttir bæjarfulltrúi sem afhenti Guðríði og Ranný viðurkenninguna.

HSV óskar þeim innilega til hamingju.