- 4.02.19
- Sigríður Lára Gunnlaugsdóttir
Fjórir iðkendur úr Vestra valin í lokahóp yngri landsliða
Hilmir, Hugi, Helena og Friðrik
Þjálfarar U16 og U18 landsliða drengja og stúlkna í körfubolta hafa valið sína loka 16 manna æfingahópa fyrir sumarið 2019. Vestri á fjóra fulltrúa í hópunum, Friðrik Heiðar Vignisson og Helenu Haraldsdóttur í U16 og bræðurna Hilmi og Huga Hallgrímssyni í U18. Í vor verða svo loka 12 manna liðin valin fyrir verkefni sumarsins 2019.
Framundan hjá þessum landsliðum eru norðurlandamót í júní og júlí í Finnlandi og síðar í sumar Evrópubikarkeppni FIBA sem fer fram í Búlgaríu, Rúmeníu og Svartfjallalandi.
Nánar
- 4.02.19
- Sigríður Lára Gunnlaugsdóttir
6. flokkur Harðar deildarmeistarar
Lið Harðar í 6. flokki varð deildarmeistari í 3. deild á síðustu helgi. Strákarnir spiluðu fjóra leiki og unnu þá alla. Þeir skoruðu 42 mörk og fengu 15 mörk á sig á sig. Það voru því átta glaðir drengir sem komu heim eftir vel heppnað mót. Þjálfari strákanna er Óskar Jón Guðmundsson
Strákarnir höfðu unnið sig upp úr 4. deild í nóvember og voru því að þreyta frumraun sína í 3. deild sem gerir árangurinn enn glæsilegri. Þeirra bíður svo erfitt verkefni um miðjan mars en þá keppa þeir í 2. deild 6. flokks liða.
Allir eru velkomnir á handboltaæfingar, æfingagjöld eru engin og æfingatöfluna má nálgast hér.
Nánar
- 1.02.19
- Sigríður Lára Gunnlaugsdóttir
Tveir körfuboltaleikir á helginni
Í íþróttahúsinu á Torfnesi fara fram tveir körfuboltaleikir næstu daga. Í kvöld föstudag tekur meistaraflokkur karla hjá Vestra á móti liði Snæfells kl. 19.15. Á sunnudag er það stúlknaflokkur Vestra sem spilar við Val/Stjörnuna kl. 15.30. Kjörið tækifæri að kíkja við og hvetja Vestra til sigurs.
Nánar
- 28.01.19
- Sigríður Lára Gunnlaugsdóttir
Super Bowl og amerískur fótbolti í Vísindaporti
Í Vísindaportinu í Vestrahúsi verður föstudaginn 1. febrúar fjallað um sögu Super Bowl og hvernig þessi geysivinsæla, árlega keppni í amerískum fótbolta hefur þróast í gegnum árin í þann menningarviðburð sem keppnin er í dag. Það eru þrjár ástæður fyrir því að fólk horfir á Super Bowl: leikurinn sjálfur, sýningin sem fer fram í hálfleik og auglýsingarnar.
Fyrirlesturinn heldur Dan Govoni sem er bandarískur að uppruna en býr nú á Ísafirði ásamt fjölskyldu sinni. Dan mun einnig fræða okkur um hvernig leikurinn fer fram, en amerískur fótbolti er mjög frábrugðinn evrópskum. Fjallað verður einnig um Super Bowl ársins 2019.
Vísindaportið fer fram í kaffistofu Háskólaseturs kl. 12:10-13 og eru allir velkomnir. Að þessu sinni fer dagskráin fram á ensku.
Að þessu sinni má búast við að Vísindaportið verði á léttari nótunum og ætti enginn sem hefur áhuga á íþróttum að láta þetta tækifæri til að fræðast um amerískan fótbolta fram hjá sér fara.
Nánar
- 23.01.19
- Sigríður Lára Gunnlaugsdóttir
Áhugaverð heimasíða fyrir íþróttaiðkendur
Á heimasíðu ÍSÍ er að finna ábendingu um áhugaverða síðu þar sem bent er á æfingar sem geta fyrirbyggt meiðsli og álagseinkenni í hinum ýmsu íþróttagreinum:
Vefsíðan fittoplay.org er einstaklega áhugaverð síða sem snýr meðal annars að fyrirbyggjandi æfingum gegn meiðslum íþróttafólks. Þar má finna upplýsingar um algeng meiðslí í fjöldamörgum íþróttagreinum greint niður á líkamshluta. Þar má einnig sjá æfingar sem koma sér vel fyrir íþróttafólk í endurhæfingu.
Að vefsíðunni og smáforritinu „Get Set - Train Smarter“ standa Alþjóðaólympíunefndin (IOC) og rannsóknarsetrið The Oslo Sports Trauma Research Center í Noregi, sem tóku höndum saman í þeim tilgangi að fækka íþróttameiðslum með því að bjóða íþróttafólki upp á fyrirbyggjandi æfingar beint í símann. Vefsíðan og smáforritið eru einstaklega notendavæn, enda stutt og hnitmiðuð myndbönd og stuttur texti meginundirstaðan. Sjá má allar æfingarnar í myndböndum og stuttum texta um hvernig gera má æfinguna rétt. Vista má öll myndböndin og skoða án nettengingar.
Íþrótta- og Ólympíusamband Íslands hvetur íþróttafólk og aðra til þess að skoða vefsíðuna fittoplay.org.
Nánar
