Fréttir

Ársþing HSV 2018 var haldið í Stjórnsýsluhúsinu á Ísafirði 9. maí kl. 17. Á þinginu var kosinn nýr fomaður HSV. Guðný Stefanía Stefánsdóttir sem verið hefur formaður HSV síðustu fjögur ár gaf ekki kost á sér til áframhaldandi starfa. Eitt framboð barst til formanns og var Ásgerður Þorleifsdóttir kjörin með lófaklappi. Úr stjórn gekk Páll Janus Þórðarson og í hans stað var kjörinn Baldur Ingi Jónasson.

Stjórn HSV er nú þannig skipuð:

Ásgerður Þorleifsdóttir formaður

Hildur Elísabet Pétursdóttir

Karl Ásgeirsson

Ingi Björn Guðnason

Baldur Ingi Jónasson

 Í varastjórn voru endurkjörin Heimir Hansson og Elísa Stefánsdóttir. Elín Marta Eiríksdóttir gaf ekki kost á sér til endurkjörs og í hennar stað var kosin Karlotta Dúfa Markan.

Á þinginu var samþykkt lagabreytingatillaga frá stjórn sambandsins þar sem lagt var til að bæta inn í lög sambansins ákvæði um að geri félag ekki skil á ársskýrslum á réttum tíma tvö ár í röð megi vísa því úr sambandinu. Einnig voru samþykktar almennar tillögur sem bárust þingi. Meðal annars samþykkti þingið að HSV myndi sækja um að halda unglingalandsmót UMFÍ árið 2021 í Ísafjarðarbæ og samþykkt var tillaga frá Vestra um að hvetja stjórnir allra héraðssambanda á Vestfjörðum að kanna kosti og galla sameiningar, allra eða hluta af héraðssamböndunum. Einnig samþykkti þingið að hvetja öll íþróttafélög sambandsins til að taka föstum tökum mál er varða ofbeldisbrot, einelti, kynferðislegt og kynbundið áreiti með það að leiðarljósi að tryggja öryggi, jafnrétti og jafnræði þeirra sem iðka og starfa innan félaganna. Koma upp viðbragsáætlunum við hvers kyns ofbeldi og útbúa verkferla til úrlausnar í samvinnu við yfirstjórn íþróttahreyfingarinnar.

 Nokkur umræða var um inneignir sem skapast hafa þegar félögum er ekki greiddur út lottóstyrkur vegna vanhalda á skýrsluskilum. Lögin kveða á um að sú fjárhæð eigi að leggjast inn á Afrekssjóð HSV en það hefur ekki verið gert. Var að lokum samþykkt tillaga sem veitti stjórn HSV óskorað umboð til að ganga frá þeim greiðslum til afrekssjóðs afturvirkt.

 Veitt voru 10 starfsmerki á þinginu.

8 hlutu silfurmerki HSV og

2 hlutu gullmerki HSV

Að auki hlaut Guðný Stefanía Stefánsdóttir gullmerki ÍSÍ og var það Ingi Þór Ágústsson stjórnarmaður ÍSÍ sem afhenti það.

Stjórn HSV hefur metið umsóknir um styrk frá Skaganum3X til að efla faglegt starf og gæði við þjálfun ungra iðkenda.  Styrkur Skagans 3X fyrir árið 2018 er kr. 1.500.000. Fyrirtækið hefur gefið vilyrði fyrir jafnháum styrk fyrir árið 2019 og verður auglýst eftir umsóknum vegna hans í lok þessa árs. Alls bárust 11 umsóknir frá átta aðildarfélögum HSV. Öll félög sem sóttu um fengu styrk, styrkupphæðir voru frá 50.000 til 300.000.

Megin markmið styrks Skagans3X er að efla faglegt starf og gæði við þjálfun ungra iðkenda er keppa undir merkjum aðildarfélaga HSV. Horft er til allra aðildarfélaga HSV og bæði stúlkna og drengja. Stuðningurinn er fyrst og fremst ætlaður sem viðbót við núverandi barna- og unglingastarf og ekki ætlaður til frekari fjárfestinga innan íþróttahreyfingarinnar.

Þau félög og verkefni sem hlutu styrk eru:

Golfklúbbur Ísafjarðar: Golfæfingar fyrir börn og unglinga með með námskeiðslotum PGA kennara. 

Hestamannafélagið Hending: Undirbúa og útbúa fræðsluefni til að taka á móti börnum úr íþróttaskóla HSV í nýja reiðhöll í Engidal haustið 2018.

Hestamannafélagið Stormur: Uppbygging barna- og unglingastarfs með reiðnámskeiðum

Hörður handknattleiksdeild: Til eflingar Vestfjarðamóts í handbolta sem er lokamótið í Íslandsmóti 6. flokks drengja.

Íþróttafélagið Ívar: Styrkja unglingastarf félagsins og bjóða upp á meiri fjölbreytni í íþróttagreinum.

Skíðafélag Ísfirðinga: æfingabúðir og þjálfaranámskeið fyrir bretti, göngu og alpagreinar.

Sæfari: Styrkja grunnstarf Sæfara, siglinganámskeið fyrir ungmenni 9-14 ára.

Vestri knattspyrnudeild: Þrjú verkefni; afreksþjálfun, endurgerð og þýðing á uppeldisstefnu og átak í kvennaknattspyrnu.

Vestri körfuknattleiksdeild: Þrjú fræðsluverkefni; þjálfaranámskeið, dómaranámskeið og tölfræðiskráningarnámskeið.

HSV þakkar 3X fyrir stuðninginn og hlakkar til áframhaldandi samstarfs við fyrirtækið

Héraðsþing HSV verður haldið í Stjórnsýsluhúsinu á Ísafirði 9. maí kl. 17. Kjörbréf hafa þegar verið send út til félaga ásamt boðsbréfum. Héraðsþing úrskurðar reikninga sambandsins, sem skulu miðast við almanaksárið. Það ræðir og gerir tillögur um starfsemi sambandsins. Léttar veitingar verða í boði.

Héraðsþig HSV er pappírslaust þing. Öll gögn þingsins verða birt hér á heimasíðu HSV undir Ársþing.

Í lok síðasta árs veitti 3x Tecnology HSV veglegan styrk til til að efla barna- og unglingastarf íþróttafélaganna hér í heimabyggð. Styrkfjárhæð er kr. 1.500.000 fyrir árið 2018 og gefur fyrirtækið vilyrði fyrir styrk að sömu upphæð fyrir árið 2019. Fyrir hönd starfsmanna sinna vill 3X Technology stuðla að bættum gæðum og faglegri vinnu við barna- og unglingastarf íþróttahreyfinga í heimabyggð. Forsvarsmenn fyrirtækisins trúa á gildi íþróttaiðkunar til forvarna og er styrkurinn hugsaður til eflingar þess.

Megin markmiðið með styrknum er að efla faglegt starf og gæði við þjálfun ungra iðkenda er stunda íþrótt sína hjá aðildarfélögum HSV. Horft er til allra aðildarfélaga HSV og bæði stúlkna og drengja. Stuðningurinn er einungis ætlaður sem viðbót við núverandi barna- og unglingastarf og ekki ætlaður til frekari fjárfestinga innan íþróttahreyfingarinnar né til æfinga eða keppnisferða.

 Stjórn HSV óskar eftir umsóknum frá aðildarfélögum sínum um styrk úr þessum sjóði fyrir árið 2018 samkvæmt þeim markmiðum sem fyrirtækið setur fram.

 Ekki er að þessu sinni stuðst við sérstakar úthlutunarreglur eða leiðbeiningar heldur geta forsvarsmenn aðildarfélaga sent inn beiðnir eða umsóknir er samræmast megintilgangi verkefnisins. Stjórn HSV mun fara yfir umsóknir og ákveða úthlutun. Vonast stjórn HSV til að fá fram fjölbreyttar hugmyndir að eflingu starfs hjá aðildarfélögum sambandsins.

 Forsvarsmenn aðildarfélaga HSV er bent á að senda styrkumsóknir til framkvæmdastjóra HSV (hsv@hsv.is) fyrir 1. maí  2018 en styrkveitingar verða afgreiddar fljótlega eftir það.

Lýðháskólinn á Flateyri

- Svo miklu meira en bara skóli

Viltu stunda nám án áherslu á einingar og próf? Taka frá heilan vetur til prófa hvað í þér býr? Velja þér ný viðfangsefni við nýjar aðstæður með nýjum vinum?

Lýðháskólinn á Flateyri auglýsir eftir umsóknum til náms frá og með 15. apríl en kennsla hefst haustið 2018. Umsóknir fara fram á  vefsvæði skólans www.lydflat.is þar sem nálgast má upplýsingar um skólann og námsframboð.

Skólinn, námsframboð og kennarar eru einnig kynnt á fésbókarsíðu skólans https://www.facebook.com/Lydhaskoli/. Einnig má nálgast kynningarefni á Instagram síðu og á youtube. Tenglar á þessar síður er að finna á www.lydflat.is

Hver sem náð hefur 18 ára aldri við upphaf námsannar getur sótt um skólavist við Lýðháskólann á Flateyri en ekki eru gerð sérstök skilyrði um fyrri störf eða menntun. Við leitum eftir nemendum sem eru áhugasamir, viljugir og tilbúnir til að taka þátt, deila ábyrgð og prófa eitthvað nýtt. 

Ekki er um eiginlegan umsóknarfrest að ræða. Opnað er fyrir umsóknr 15. apríl. Afgreiðsla umsókna hefst 1. maí og verða umsóknir sem berast fyrir þann tíma settar í forgang. Eftir það afgreiðum við umsóknir jafnóðum og þær berast.

Umsækjendur eru hvattir til að sækja um sem fyrst til að auka líkur á inntöku. Það er takmarkað pláss á hverri önn, fyrstir koma, fyrstir fá. Ef nemendur sækja um og það er þegar orðið fullt er þeim boðið að vera á biðlista og/eða fá pláss á næstu önn.