Fréttir

Þá er komið að því, íþróttaskóli HSV byrjar á morgun fimmtudag.  HSV er ásamt nokkrum aðildarfélögum að setja upp skráningarkerfi þar sem hægt verður að skrá börnin sín í gegnum internetið.  Verður kerfið tilbúið mjög fljótlega.  Þó ekki sé hægt að ganga frá skráningu byrjar íþróttaskólinn á morgun og mæta krakkarnir samkvæmt stundatöflu sem finna má hér á heimasíðunni.  Mikil spenna og tilhlökkun er hjá þjálfurum að byrja og við vitum að krakkarnir bíða einnig spennt á að byrja. Hlökkum til að sjá sem flesta krakka á morgun.

Við munum byrja á því að vera úti fyrstu vikurnar svo allir þurfa að mæta klæddir eftir veðri og mæta fyrir utan sundhöll

Ísafjarðar.  Þeir sem ætla að æfa sund mæta samkvæmt stundatöflu í sundhöll Ísafjarðar. 

Fyrsta grein í boltaskóla sem farið verður í er knattspyrna.

Stundaskrá íþróttaskóla HSV er nú komin inn á vefinn.  Hægt er að nálgast hana með því að ýta á tengil hér vinstra megin "stundaskrá" og þar er hægt að opna hana í excel formi.  Til að útskýra töfluna þá þýðir t.d. 3-4 kvk að þar er tími fyrir 3-4.bekk stúlkna, eins þýðir þá 1-2.KK að þann tíma á 1-2.bekkur drengja. Hægt er að velja um tvær skrár og er innihald þeirra það sama en þeir sem eru með eldra excel í sínum tölvum skulu velja skrá sem endar á excel97.  Hægt er að senda fyrirspurn vegna skólans á yfirþjálfara í tölvupóstfang ithrottaskoli@hsv.is. 

Íþróttaskóli HSV mun hefjast fimmtudaginn 1.september.  Íþróttaskólinn er samvinnuverkefni HSV, aðildafélaga HSV og Ísafjarðarbæjar.  Íþróttaskólinn er ætlaður börnum í 1-4. bekk í grunnskólum Ísafjarðarbæjar og geta öll börn á þessum aldri skráð sig í skólann og tekið þátt.  Íþróttaskóli HSV mun leggja áherslu á grunnþjálfun barna ásamt því að þau fái þjálfun í flestum þeim íþróttagreinum sem í boði eru á eldri stigum aðildarfélaga HSV.  Á haustmisseri er skólanum skipt upp í þrjá hluta þ.e. grunnþjálfun, boltaskóla og sund.   

Í grunnþjálfun er áhersla lögð á hreyfingu og hreyfiþroska barna.  Fjölbreyttar æfingar verða í boð, farið í leiki, þrautir, fimleika, hopp, hlaup, köst og margt fleira.  Grunnþjálfun er í boði tvisvar í viku.

Boltaskóli:  Í boltaskólanum verða boltagreinum skipt upp í tímabil og þjálfuð ein grein í einu.  Boltagreinarnar í skólanum eru knattspyrna, blak, körfuknattleikur og handknattleikur.   Geta börnin því fengið að kynnast öllum þessum greinum, æft hverja grein og náð góðum tökum á hverri grein.  Boltaskóli er í boði tvisvar í viku.

Sund:  Í íþróttaskólanum verður almenn sundþjálfun í boði og verða æfingar tvisvar í viku.

Ráðinn hefur verið yfirþjálfari íþróttaskólans sem er Kristján Flosason.  Kristján Flosason er íþróttafræðingur að mennt og hefur áralanga reynslu af þjálfun barna og unglinga.  Yfirþjálfari sér um alla skipulagningu íþróttaskólans í samvinnu við aðildarfélög HSV.  Yfirþjálfari íþróttaskóla HSV mun sjá um alla grunnþjálfun og boltaskóla fyrir börn í 1-2. bekk.  Sundþjálfari verður Margrét Eyjólfsdóttir en hún hefur þjálfað börn fyrir sundfélagið Vestra í mörg ár og hefur náð frábærum árangri í starfi sínu.  Þjálfarar í boltaskóla fyrir 3-4. bekk verða fengnir frá aðildafélögum sem koma með sérþekkingu á sinni grein og kafa dýpra í hverja boltagrein.  HSV er mjög ánægt með að hafa jafn hæfa og reynslumikla þjálfara í íþróttaskólanum í vetur.

Verð á haustönn verður 7000 kr fyrir önnina hvort sem valið er allir eða einn hluti íþróttaskólans.

Skráning í íþróttaskólann mun fara fram í gegnum sérstakt skráningarkerfi sem verður aðgengilegt á heimasíðu HSV.  Frekari fréttir af því mun koma inn fljótlega.

Markmið íþróttaskóla HSV er:

• Fá sem allra flest börn til að iðka íþróttir
• Að fyrstu kynni barna af íþróttaiðkun sé jákvæð
• Að börn fái að kynnast sem flestum íþróttagreinum
• Að auka gæði þjálfunar
• Lækka kostnað heimila við íþróttaiðkun barna
• Auka grunnþjálfunarhluta æfinga, almenna hreyfingu, hreyfiþroska og hreyfigetu 

Á Suðureyri, Flateyri og Þingeyri verður íþróttaskólinn unnin í samvinnu við íþróttafélögin á hverjum stað og eru frekari fréttir að vænta á allra næstu dögum.

Auglýst er eftir yfirþjálfar í íþróttaskóla HSV

Héraðssamband Vestfirðinga óskar eftir því að ráða metnaðarfullan og drífandi aðila í starf yfirþjálfara íþróttaskóla HSV.  Íþróttaskóli HSV sér um alla þjálfun barna í 1-4. bekk í Ísafjarðarbæ í samvinnu við aðildarfélög HSV.  Í íþróttaskóla HSV verður lögð áhersla á grunnþjálfun iðkenda ásamt því að þau fá þjálfun í flestum þeim íþróttagreinum sem í boði eru á eldri stigum hjá aðildafélögum HSV. Um er að ræða 75% starf.

Starfssvið

·         Ábyrgð á þjálfun og skipulagningu íþróttaskóla HSV

·         Skipuleggja grunnþjálfunarhluta skólans

·         Skipuleggur í samstarfi við þjálfara aðildarfélaga þjálfun í öðrum greinum

·         Skipuleggur starf kynningagreina í íþróttaskólanum

·         Sér um samskipti við foreldra iðkenda

·         Sér um samskipti við þjálfara aðildarfélaga

·         Skipuleggur í samstarfi við aðildarfélög íþróttamót og aðra viðburði

Menntunar – og hæfniskröfum

·         Háskólamenntun á sviði íþrótta æskileg

·         Mikil reynsla af þjálfun yngri barna æskileg

·         Jákvæðni og lipurð í mannlegum samskiptum

·         Sjálfstæð og skipulögð vinnubrögð

·         Stundvísi

·         Hreint sakavottorð

Umsóknarfrestur er til 7.ágúst og þarf einstaklingurinn að geta hafið störf 15.ágúst.  Frekari upplýsingar fást hjá framkvæmdarstjóra HSV í netfang hsv@hsv.is og í síma 450-8450.